Raban Berita Iban Online

Berita Iban Tebaru

Friday, September 2, 2011

Pemerindang ari menua tasik merindang ngintu Hari M’sia, 16 Sept

0 comments

KUCHING: Nyerumba ngerami Hari Malaysia kena 16 September, mensia mayuh ke datai enggau nyambut pengerami nya deka diperindang enggau seraban pemerindang ari menua tasik ti bedau kala merindang ba menua Malaysia ke nyengkaum Sarawak.

Menteri Dagang Temuai enggau Pesaka Tuai Datuk Amar Abang Johari Tun Openg madahka pemerindang nya deka dipandangka ba Tebing Ai Kuching sereta ngena mayuh chaya lampu.

Nitihka penerang ari Abang Johari, maya tu ila pemerindang ari menua tasik deka diambi merindang mensia mayuh.

Iya madahka ngena chara tu nya ulih narit mayuh agi temuai menua luar datai ngemataka pengerami ke diatur ba Sarawak.

“Baka ke disemaya aku sebedau tu, kitai mandangka pemerindang ti enda kala dipandang sereta manah agi ari ke ngelama tu.

“Taun tu seraban ari menua Florida, US dipinta datai mantaika pemerindang ba Tebing Ai Kuching, ti ngena mayuh cahaya enggau landskap sungai.

“Sebengkah seni ‘formation design’ ba atas ai ke ti bererenggat,” ku Abang Johari ti enggai nyerita enggau silik tang minta mensia mayuh sama datai sampal malam 16 September ba Tebing Ai Kuching enggau Kunsil Nengeri (DUN) baru deka sama ngemata sereta ngerami Hari Malaysia nya ila.

UiTM Mukah deka muka kursus ‘Degree in Herbs Production’

0 comments
KUCHING: Universiti Teknologi MARA (UiTM) pampang Mukah, Sarawak deka nyendiaka kursus baru ‘Degree in Herbs Production’ sepengudah pengawa ngaga palan kampus nya tembu.

Rektor UiTM Sarawak, Prof. Dr Jamil Hamali madahka pengawa ngaga kampus Mukah nya deka berengkah ba pun taun 2012 lalu disadang deka nerima penatai urung 2,000 iku pelajar.

“Bengkah kursus ke baru “Degree in Herbs Production” deka disediaka ba kampus Mukah sepengudah pengawa ngaga palan nya tembu.

“Tu deka meri pengelantang ngagai pelajar UiTM ke ngambi progrem ‘Diploma in Planting Management’ nyambung pelajar sida iya ngagai renggat degree,’ ku Jamil.

Nengeri Sarawak chukup besai ke ngembuan mayuh asil kampung ke tau dipansik sereta dikemansangka nyadi pemakai tauka ubat dikena ungkup tuju ba pengerai, tandu iya.

Iya mansutka penerang tu ngagai pengarang berita ba pengerami rumah tebuka nyerumba ngintu Hari Raya ba rumah iya di Siol Kandis ditu, kemari.

PRU ke-13: PBB deka mantaika raban orang biak

0 comments
KUCHING: Pengawa bepilih besai (PRU) ti ke-13 ke deka datai, perintah Barisan Nasional (BN) nengeri Sarawak deka mantaika orang biak sereta bepengelandik.

Menteri Pengawa Berumah enggau Pemansang Dalam Nengeri ti nyadi Sapit Presiden Parti Pesaka Bumiputera Bersatu (PBB) Datuk Amar Abang Johari Tun Openg madahka parti nya deka mantaika orang biak sereta bepengelandik endang sepekara ke patut dikereja kena meri awak ngagai sida nyadi tuai.

Iya ke lalu nyadi Kaban Kunsil Nengeri (ADUN) Satok madahka nya dikena napi ubah ke majak mar jemah ila.

Nambahka nya, pekara tu diatur dikena nambahka penemu sereta ngemenuhka peminta raban nembiak menua tu, ku iya lebuh dikerandau pengarang berita ba Rumah Tebuka Hari Raya iya ke diatur ba Sri Minangkabau II ditu, kemari.

Lebuh ditanya Datuk Seri Mahmud Abu Bekir entara chalon baru nganti Dato Sri Sulaiman Abdul Rahman Taib ba PRU ke-13, iya madahka, agi kelalu tumu endur nentuka sapa, tang senaya orang ke biak ti ulih nyadi ketuai endang mayuh.

“Baka pengawa bepilih besai nengeri apin lama, kitai endang deka mantaika orang biak ba PRU, laban tu endang sebengkah proses dalam parti, orang biak diberi awak nganti penuduk orang bisi diatu.

Kelab KTS ngatur pengawa nyali darah

0 comments

SIBU: Sekali agi mensia mayuh diperansang ngulu kimpin nyali darah ti diatur Kelab KTS kena 10 September tu.

Kimpin tu diperambu deka diatur berengkah ari pukul 2 lemai ba Star Mega Mall beserimbai enggau nyambut penumbuh Kelab KTS Ke-30.

Kena ngelaie pengelempung ati bala ke nyali darah, sida deka diberi payung ari Shell, sebungkus biskuit Rayat enggau 20 bungkus me Daddy.

Penerang silik tau ditanya ngagai Kelab KTS nengah lumur 019-8596020. -BorneoPost