KUCHING: Atur Mindah Besekat (PKP) ba semua nengeri Sarawak agi dipejalaika baka selama sepengudah 28 Jun tu, berindik ari kes COVID-19 ti agi tinggi di nengeri tu.
Komiti Penusah Ngenyit Nengeri Sarawak (JPBNS) madah ba dalam penerang, pemutus ngelanjarka timpuh PKP tu digaga sebaka enggau nitihka timpuh PKP ba serata menua (Malaysia).
Berindik ari timpuh PKP dilanjarka tu, semua 'guideline' (SOP) ke udah nyengala bisi ti ditukuka JPBNS mega agi dikena baka ngelama tu.
Kelimpah ari nya, Chairman JPBNS, Datuk Amar Douglas Uggah Embas madah ba dalam ripot The Borneo Post, PKP di Sarawak deka dilanjarka sebaka enggau di serata menua.
Uggah ti mega Sapit Kepala Menteri Sarawak madah, PKP tu dilanjarka berindik ari kes COVID-19 ti agi tinggi di Sarawak.
"Kes kitai agi tinggi amat, nya alai kitai ngelanjarka PKP kitai," ku Uggah.
Sebedau tu, Menteri Besai Malaysia, Tan Sri Muhyiddin Yassin madah, PKP di serata menua (Malaysia) sigi enda ditembuka pagila.
Kenu ku Menteri Besai, Malaysia agi ba dalam fasa keterubah PKP ba baruh 'Pelan Pemulihan Negara' ti dipaduka tembu pagila.
"Tang taja pia, PKP deka dilanjarka ketegal kes COVID-19 agi ngelui 4,000 kes sehari," ku Menteri Besai.
Dalam pekara kebukai, JPBNS madah pelajar ti deka nyambung pelajar tauka sekula di luar negara enggau begunaka vaksinasi ulih minta ba 'Pasukan Petugas Imuninasi COVID-19 (CITF) Sarawak'.
Peminta nya ulih digaga nengah email ke (citfsarawak@sarawak.gov.my) sereta dipegulaika enggau nama penuh, lumur tingki (kad pengenalan), ID MySejahtera, lumur talipaun binching, nama universiti, bukti regista, surat (offer letter) universiti, kemaya deka berengkah (tarikh mula), kebuah nuan deka bejik vaksin enggau palan pelilih endur nuan deka dijik vaksin.