KUCHING: Pengelenyau siku anembiak indu ti beumur 14 taun udah ditemu kena Hari Tiga (23 Jun) diatu deka dipansik nitihka genteran kes masung.
Nitihka penerang ke diterima kami, indu ke lenyau nya dikelala ngena nama Aina.
Kenu ku Kepala Polis Pelilih Padawan, Superintenden Aidil Bolhassan, berindik ari kes nya, iya nerima ripot ke digaga apai enggau indai anembiak indu nya di Balai Polis Batu Kawa.
Asil pansik tumu raban polis, anembiak indu nya kenu ku diau segulai enggau pangan lelaki iya nya pengelama lapan hari enda pulai ke rumah.
"Berindik ari ripot ke digaga indai anembiak indu nya, raban polis nangkap pangan lelaki anembiak indu nya kena mantu bejalaika pengawa mansik. Kes nya diatu dipansik ari baruh 'Seksyen 376 Kanun Keseksaan'," ku iya madah ba siti penerang.
Pangan lelaki anembiak indu nya (suspek) ti beumur urung 20-an enggau penatai ari Kota Samarahan.
Ku iya, anembiak indu nya enda pulai ke rumah pengudah pansut deka ngambi bup kereja ba sekula kena 15 Jun.
Berindik ari nya, apai anembiak indu nya ngaga ripot polis enggau mega bejalaika pengawa ngiga anak iya nya.
Anembiak indu nya ditemu ba palan bebeli barang di Semariang lebuh iya deka meli kad sim talipaun binching urung jam 3 lemai.
Nangkan ke nya, anembiak indu nya dibaie betemu polis enggau pengudah nya iya dibaie ke Sepital Perintah Sarawak (HUS) ngambika ulih diperesa pengerai.