 |
| Raban polis benung bejalaika Nyekat Jalai Alun (roadblock) |
KUCHING: Kepala Menteri Datuk Patinggi Abang Johari Tun Openg madah, pemutus sekalika Atur Nagang Pemindah (PKP) deka dilanjar tauka enda di nengeri tu, bepanggai ba aum Kaunsil Pengelikun Menua (MKN) tu ila.
Naka kediatu, PKP di Sarawak deka ditembuka naka 28 Jun tu.
Lebuh bejaku ba aum media kemari, Abang Johari madahka opis kunsil nya bedau ngaga sebarang pemutus bekaul enggau PKP sekalika dilanjar pengudah abis timpuh iya nya kena 28 Jun.
“Baum dulu, ku iya madah lebuh nimbal tanya bekaul PKP nya di Palan Bejik Vaksin COVID-19 (PPV) di palan industri Longi di Samajaya High Tech Park ditu, kemari.
Sapit Kepala Menteri ti mega nyadi chairman Komiti Mutarka Penusah Ngenyit Nengeri Sarawak (JPBNS) Datuk Amar Douglas Uggah Embas, ti bela bisi nguluka Kepala Menteri ngagai PPV di palan industri, madahka MKN seruran baum Hari Satu enggau Hari Lima, lalu dikearapka deka ngaga pemutus nya dalam timpuh ke semak tu.
PKP di Sarawak ti berengkah diteritka kena 29 Mei tu tadi, digaga kena ngemunaska pengelekai penyakit COVID-19, lalu deka abis timpuh atur tu iya nya kena 28 Jun minggu baru tu ila.
Sebedau nya, kena 19 Jun tu tadi, Menteri Opis Kandang Menua enggau Pengawa Berumah ti mega nyadi Penyanding Penemu JPBNS, Dato Sri Dr. Sim Kui Hian madahka enti nyema kes COVID-19 diperatika bisi nurun, PKP engka enda dilanjarka di Sarawak.
Taja pia, dalam kandang berapa hari tu ke udah, kes COVID-19 ti di rikod ninting hari diperatika bedau dipeda kurang ari 500 kes.