 |
| Program ‘Smart Parenting’ ti diatur ba SK Beliong dikena meri penyedar pasal isu bekaul penanggul rama kelebih agi dikemulaka ‘scammer’ ngagai apai indai enggau pengajar. |
KUCHING: Dikena meri gerah tauka betesauka pasal isu bekaul penanggul rama kelebih agi dikemulaka ‘scammer’ Sekula Primari (SK) Beliong ngatur program dikumbai ‘Smart Parenting’.
Program licha nya diuluka Menijar Bank Rakyat Pampang Kota Samarahan Halmi Mosli, Pemesai Polis ari Indu Opis Kontinjen Sarawak Inspektor Haslee Shafiee enggau Pemesai Perubat Klinik Pengerai Bako Dr. Nor Azila Luhi.
Entara penerang ke bisi dibantaika rambau program nya pasal penemu tauka chara ngagai bala raban sekula enggau apai indai nembiak sentang chara bala ‘scammer’ ngemulaka orang.
Program tu mega meri lalau ngagai mensia mayuh pasal pengelikun diri sereta ruang bilik ari bala orang jai ti beambi ulih nengah online.
Kelimpah ari nya, isu pasal penyakit berampit mega bisi dibantaika Dr Nor Azila kelebih agi penyakit influenza enggau penyakit bukai.
Program sehari nya nerima penatai komuniti besemak lalu diatur ba Balai Tebuka SK Beliong, kena 29 Ogos tu tadi.
Entara tuju bukai program tu diatur iya nya ngambika bala apai indai nemu tanggungpengawa sida ngagai sukut disiplin enggau pengerai bala anak.
Apai indai mega dikeandalka ulih mantu pengajar sekula nagang ulah enda manah bala nembiak awakka diseridi tumu nyadi modal mensia ti beguna jemah ila.
Sama bisi datai Pemesai Pelilih Menua Asajaya Rais Ahmad enggau bala bukai. #suarasarawak