JULAU: 11 iku peranak menua ditangkap polis ketegal ditemu nyabung manuk ba kebun kelapa sawit di Batu 15 Jalai KJD, ditu, kemari.
11 iku ari sida ke kena tangkap nya, 10 iku lelaki enggau siku indu, umur entara 36 nyentuk 72 taun.
Kepala Polis Pelilih Julau, Deputi Superintendan Andam Sulin madah, semua sida iya ditangkap lebuh Raban Polis Bagi Tasat Jenayah Julau bejalaika abas ngenyit urung jam 3 lemai kemari.
"Asil ari abas ngenyit nya, raban polis mujur ngerampas lima manuk sabung ti agi idup, lima iku manuk sabung udah parai, siti utai kena nimbang, siti kotak ti bisi ditulis lumur enggau sebilah taji manuk," ku iya madah dalam penerang sehari tu.
Ku iya, semua sida iya (suspek) kena ukum kompaun ari baruh "Peraturan 17 (1) Peraturan-Peraturan Pencegahan Dan Pengawalan Penyakit Berjangkit (Langkah-langkah Di Dalam Kawalan Tempatan Jangkitan) (No 3) 2021."