KUCHING: Sarawak dipelabaka deka nerima stok 'vaksin dos tunggal Cansino' tengah bulan Tujuh (Julai) tu.
Chairman Komiti Mutarka Penusah Ngenyit Nengeri Sarawak, Datuk Amar Douglas Uggah Embas madah, perintah nengeri udah minta 650,000 dos vaksin nya.
"Cansino tu engkeman amat ungkup rayat kitai ti diau ba kandang menua ulu entigis baka orang Penan.
"Raban perubat kitai semina sekali aja kin ngejik vaksin lalu tu nulung ngurangka ungkus logistik, perengka pengangkut enggau utai bukai," ku iya pengudah ke ngabas palan vaksinasyen COVID-19 ba Balai Mensia Mayuh Spaoh ditu, semalam kemari.
Ku iya, apin lama ke udah raban perubat udah bejalai ngagai beberapa buah rumah panjai enggau genturung pendiau ba menua ulu entigis baka di Bagi Menua Miri enggau Kapit, ngejik peranak dia ngena vaksin Sinovac.
“Kitai mesti jampat ngereja tu laban pengelekai penyakit tu ba kandang menua nya begunaka kitai jampat bejalaika pengawa.
“Pekara dikemeratka kitai iya nya deka nyelamatka nyawa,” ku iya.
Bekaul enggau program vaksinasyen di Bagi Menua Betong, Uggah ke mega Kaban Kunsil Nengeri (ADUN) Bukit Saban madah, iya amat berasai gaga ati enggau pemanah prestasi sereta pengawa dikereja semua terabai menua.
“Aku dipadahka Pemesai Pengerai Bagi Menua Betong Dr. Johnny Pangkas naka ke diatu 35,312 iku udah dijik dos keterubah lalu 7,236 iku udah dijik dos kedua vaksin.
“Aku arap endar enggau pemujur sereta penyikar raban terabai menua kitai, Bagi Menua Betong ulih nembuka program vaksinasyen tu ujung bulan baru,” ku iya.
Iya mega meri terima kasih ngagai Komiti Mutarka Penusah Ngenyit Bagi Menua Betong laban udah ngaduka proses nya enggau chukup manah.
"Kitai mujur ngejik 55,000 dos tiap hari dalam sesiti maya," ku iya.
Ku iya, naka ke diatu, 910,595 iku di nengeri tu udah nerima dos vaksin keterubah tauka kedua.
Kaban Parlimen Betong, Datuk Robert Lawson Chuat, Sekretari Kepala Menteri Dr Richard Rapu, Residen Bagi Menua Betong, Friday Belik enggau Dr Johnny ba Balai Mensia mayuh Spaoh, mega bisi datai dia maya nya.