 |
| PICHA KENA NYADIKA CHUNTO AJA: Raban Pengeluan besampika orang ti dipechayaka udah parai ketegal penyakit COVID-19. |
KUCHING: Sarawak kemari ngerikodka lima udah nadai tauka parai ketegal penyakit COVID-19 enggau 491 kes positif baru, ku Komiti Penusah Ngenyit Nengeri Sarawak (JPBNS).
Enggau penambah lima pemati kemari, kes parai ketegal COVID-19 ti dirikodka di nengeri tu diatu udah manggai ngagai 401 kes.
Urung 316 kes tauka 64.35 peratus ari penyampau kes kemari ditemu di lima pelilih menua, lalu Kuching ngerikodka kes positif ti pemadu tinggi, iya nya 106 kes, lalu ditangkan Sibu, Bintulu, Miri enggau Subis.
Pelilih menua ke bisi ngerikod kes positif baru, kelimpah ari Kuching, iya nya Sibu (79), Bintulu (50), Miri (47), Subis (34), Sarikei (27), Betong (22), Tatau (19), Kapit (17), Song (12), enggau Kanowit (11).
Nangkan ka nya pelilih menua bukai ke bisi kes positif iya nya Telang Usan (9), Bau (9), Bukit Mabong (8), Sri Aman (8), Lubok Antu (6), Selangau (5), Serian (5), Tebedu (5), Saratok (3), Pusa (2), Dalat (2), Matu (1), Limbang (1), Meradong (1), Pakan (1) enggau Mukah (1).
Ku JPBNS, ari 491 kes baru kemari, 52 iku bisi mandangka tanda pendiau kena rampit pengelekai COVID-19, lebuh beperesa pengerai di palan pengerai.
“Bisi dirikod mega, iya nya urung 408 kes ke ditemu kemari, iya nya sida ke udah di asuh kuarantin.
“Nitihka tusun kes, 312 kes nya sida ke bisi kaul enggau kes positif COVID-19, ke alai ari penyampau nya, 15 kes mandangka sida bisi kena rampit COVID-19; 93 kes sida ke dalam kluster aktif diperesa pengerai, lalu lima kes mandangka bisi kena rampit; 54 kes bukai iya nya sida ke beperesa ba palan pengerai kediri empu, lalu tiga kes bisi mandangka diri kena rampit; 29 kes sida ke bisi tanda-tanda kena rampit, ke beperesa ba palan pengerai; dua kes baru pulai ari menua luar, Indonesia ke dikumbai kes Import A, tang nadai tanda-tanda kena rampit; enggau siti kes bekaul enggau siku orang ke baru pulai ari nengeri dalam Malaysia ke dikumbai kes Import B, tang kes nadai mandangka diri bisi kena rampit,” ku JPBNS madah nengah jaku penerang kemari.
Ba kes pemati laban pengelekai COVID-19, kes pemati dirikod di sepital menua tu, iya nya siti kes di Sepital Besai Sarawak tauka HUS, enggau empat kes di Sepital Sibu.
Sida ke parai nya beumur entara 57 taun ngagai 85 taun, iya nya siku ke parai, ari Lubok Antu (berubat di HUS) lalu empat iku agi ke parai nya ari Kanowit enggau Sibu (Sepital Sibu). Semua kes bisi penyakit ko-morbid, darah tinggi, dislipidemia, kemi manis, sakit tungkul ati, tungkul sengayuh enggau sakit ati ti raya enggau obesiti.
Kelimpah ari nya, kemari 421 kes baru ke udah gerai lalu dikemendarka pulai (discaj), lalu ari penyampau nya, 86 kes (HUS enggau PKRC HUS); 77 kes (Sepital Sibu enggau PKRC sepital Sibu); enggau 61 kes (Sepital Miri enggau PKRC sepital Miri).
“Penyampau nya mega nyengkaum 59 kes (Sepital Bintulu enggau PKRC sepital Bintulu); 55 kes (Sepital Sarikei enggau PKRC sepital Sarikei); 34 kes (PKRC Serian); 25 kes (Sepital Kapit enggau PKRC sepital Kapit); 11 kes (PKRC Mukah); lapan kes (Sepital Sri Aman enggau PKRC sepital Sri Aman); empat kes (PKRC Lawas); enggau siti kes (PKRC Betong).
“Lalu tu mai ke semua penyampau kes positif COVID-19 ke udah gerai tauka dikemendarka pulai udah nyapai 52,218 iku mensia mayuh tauka 82.48 peratus ari penyampau ke semua kes COVID-19 di Sarawak,” ku JPBNS.
Taja pia, pemayuh kes aktif ke agi berubat sereta di kuarantin di PKRC enggau wad sepital di serata menua, bisi dalam 10,545 iku mensia mayuh orang.
Kelimpah ari nya, senentang PUI ke bisi diripot, bisi dalam 491, lalu naka kemari nadai PUI ke agi nganti pemutus makmal.
JPBNS mega udah ngenukuka sekeda genturung pendiau enggau endur gawa di nengeri tu kena pentin Atur Nagang Pemindah Diteritka Agi (PKPD) ke udah berengkah digaga di Lubok Antu enggau Bintulu, iya nya kemari (26 Jun ngagai 9 Julai), enggau PKPD di siti ari genturung pendiau di Betong berengkah ari sehari tu (27 Jun).
PKPD nya mungkur dua buah genturung pendiau di Lubok Antu, Rh. Nancy, Marup Atas, Engkilili, Rh. Langkop, Marup Atas, Engkelili, lalu di Bintulu, iya nya Setinggan Jalan Kidurong enggau Rumah Sewa Atas Kedai Jom Ngeteh.
Kelimpah ari nya, di Betong, semina sebuah aja genturung pendiau diberi atur PKPD, iya nya Rh. Mendali, Buyong Panjai ke digaga berengkah seharitu (27 Jun ngagai 10 Julai).
PKPD ke udah chukup timpuh berengkah ari kemari (26 Jun) lalu enda ibuh agi diberi atur PKPD, iya nya Rh. Mambong, Nanga Lingah di Julau, enggau Rh. Robert anak Pengabang, Sebauh di Bintulu.
Kelimpah ari nya, Polis Diraja Malaysia (PDRM) naka kemari, udah ngeluarka urung 48 kompaun di pelilih/sitak menua Kuching (27), Bintulu (7), Simunjan (5), Sibu (4), Saratok (2), Lawas (2) enggau Padawan (1) laban enda nitihka atur Prosedur Operasi Standard (SOP) baka ke udah ditetapka ulih Perintah.
PDRM madah entara penyalah nya, bekedayau ba palan mensia mayuh lebih ari pukul 10 malam sereta nadai kebuah ke patut ba endur nya (25 kompaun); kedai agi buka ari timpuh jam ke patut (6); begelumu ba palan mensia mayuh (5); nadai permit mindah ngagai pelilih menua bukai (3); lebih orang dalam kerita (3); enda ‘scan QR kod’ MySejahtera (3); makai ba dalam kedai ke enda dikemendarka (2) enggau nginti ba palan mensia mayuh (1).
“Enggau penyampau tu, ke semua kompaun ti udah dikeluarka ari 18 Mac 2020 datai ke sehari tu (kemari), bisi dalam 8,332 kompaun,” ku PDRM. #utusanborneoonline