 |
| Aaron benung ngemataka Program Bejik Vaksin ti dipejalaika di SMK Baleh. |
SIBU: Opis Pengerai Bagi Menua Sibu ngetuka Program Bejik Vaksin enda lama di Balai Penghulu Seribu, Skim Berumah Baru Nanga Tada, Kanowit enti nitihka pelin Program nya deka dipejalaika berengkah ari pagila enggau lusa.
Sapit Menteri Pengerai Datuk Aaron Ago Dagang madah, kebuah pia ketegal bisi kes positif COVID-19 ti ditemu bisi ngelekai ba peranak di genturung pendiau berumah baru nya.
Ku Aaron, pengawa nyidi kes aktif (ACD) deka dipejalaika kena nentuka pengawa mansik enggau meresa kontak semak dipejalaika.
“Nadai peranak ti tekeruga berindik ari pemutus ngetuka program tu enda lama laban sida endang bedau bejik vaksin COVID-19.
“Program PPV nya deka dibansi ngagai kandang menua Bawan, Kanowit ngambika peranak ari kandang menua Jalai Semaram, Mapai enggau Woh ulih dijik vaksin.
“Kelimpah ari Bawan, peranak di kandang menua Pidai, Tuah, Jih, Dap enggau rumah panjai ke semak mega bedau dijik dos vaksin COVID-19,” ku iya lebuh dirandau ngena talipaun, kemari.
Aaron ke mega Kaban Parlimen Kanowit sama madah, program vaksinasyen di kandang menua Jagau deka dibantu Raban Soldadu Malaysia (ATM).
"Semua peranak di Machan enggau Ngungun udah 100 peratus bejik dos vaksin keterubah,"ku iya.
“Ba Balai Komuniti Pelilih Menua Kanowit, program vaksinasyen dipejalaika ninting hari ungkup peranak di kandang menua pasar Kanowit enggau rumah panjai ti besemak,” ku iya.
Ku Aaron nyemetak, raban sida nengah KKM seruran bebendar tuka nadai rayat nengeri tu ti kena tinggal ari betuchuk vaksin COVID-19.