 |
| TENAKO-NAKO: Tiga lelaki nya (suspek) agi duduk ba mija enggau benung rindang main mahjong. |
SIBU: Tiga lelaki benung rindang main mahjong ba dalam sebuah kedai, di Lorong Sena 8, mujur ditangkap polis kemari.
Ketuai Polis Pelilih Sibu, ACP Stanley Jonathan Ringgit madahka, tiga lelaki nya (suspek) mujur ditangkap raban polis lebuh bejalaika abas ngenyit ba kedai nya urung jam 4.20 lemai.
Abas ngenyit nya diuluka Inspektor Hairul Hussin, D7 Bagi Tasat Jenayah Pelilih (IPD) Sibu.
“Lebuh abas ngenyit nya, polis ngerampas sebuah mija kayu, tiga buah bangku pesetik, 112 biji buah mahjong, tiga igi dadu enggau sigi buah tanda,” ku iya lebuh dirandau pengarang berita, sehari tu tadi.
Ku iya, tiga iku lelaki nya (suspek) beumur entara 54 nyentuk 61 taun, ditan ari baruh "Seksyen 6(1) Akta Rumah Judi Terbuka 1953."
“Sida iya tiga mega deka ditasat ari baruh "Per.11(1) (No. 3) Peraturan-Peraturan Pencengahan dan Pengawalan Penyakit Berjangkit (Langkah-Langkah Di Dalam Kawasan Tempatan Jangkitan) (No. 2), 2020."
“Sida iya tiga (suspek) deka dilepaska sereta jamin polis pengudah nerima penerang enggau pansik kebukai tembu,” ku iya.