 |
| Dato Sri Fadillah Yusof |
KUCHING: Pansik benung digaga Opis Menteri Kereja (JKR) Sarawak beratika chara ngemutarka penanggul penyekut jalai di sepemanjai jalai Matang ditu.
Menteri Kereja, Dato Sri Fadillah Yusof madah pejalai trafik di sepemanjai jalai Matang kelebih agi di bulatan Emart majak sekut berindik ari mensia mayuh ke diau di sitak nya sereta penyampau kerita ke majak nambah.
“Kami udah berandau lalu bejuraika pekara tu minta bantu ari polis ngambika sida iya ulih nganjung warden trafik ngagai bulatan Emart dalam timpuh sementara tu dulu.
“Enti deka ngemutarka pekara tu dalam timpuh ke panjai, kami benung beratika bakani kami ulih ngemanahka agi pejalai trafik di bulatan tu nengah chara masang lampu trafik.
“Tang enti deka ngaga jalai betungkat pan, nyangka enda ulih digaga laban jalai tu ngembuan kelalu mayuh simpang nuju ngagai genturung rumah mensia mayuh.
“Berindik ari nya, kami minta piak JKR mansik chara ngemutarka penanggul tu nengah chara ke pengabis manah, ngemutarka penyekut jalai di sepemanjai jalai Matang,” ku iya.
Iya madah munyi nya lebuh bejaku ba siti atur pengawa ‘gotong royong’ di sitak rukun tetangga (KRT) Taman Dahlia di Matang semak ditu, kemari.
Fadillah ti mega nyadi chalun Barisan Nasional (BN) penuduk Parlimen Petra Jaya nandu baru madahka, Perintah enggau naka ulih ngemutarka penanggul penyekut jalai tu tang pengawa nya enda ulih negmutarka penanggul nya enggau silik agi.
Ketegal nya ku iya, Perintah baruh pegai Kepala Menteri Datuk Patinggi Abang Johari Tun Openg deka ngaga sistem Trafik Aliran Ringan (LRT).
LRT nyadi sistem pengangkut ke mensia mayuh ke penagbis manah kena meransang rayat ngena pengangkut ke mensia mayuh lalu ngurangka penyekut jalao di jalai alun.
Taja pia, iya madah, semua perambu tu enda ulih mujur enti nadai kerejasama ari semua piak kelebih agi rayat. #UtusanBorneo