 |
| Dato Sri Fatimah Abdullah |
Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Anak Mit, Dato Sri Fatimah Abdullah madah, nya senipak enggau 2018 taun ngenegapka orang indu.
“2018 iya nya taun ngenegapka orang indu. Kitai nengah Opis Orang Indu enggau Ruang Bilik Sarawak (JWKS) deka ngemeratka beberapa pekara tauka bidang dikena ngangkat sereta ngenegapka orang indu.
“Kami ngasaika bidang ti pemadu baru ke patut dikemeratka sereta dipasukka taun tu iya nya ngenegapka orang indu dalam bidang adat enggau main asal.
“Bidang baru nya dipekuhka kitai kelimpah ari enam bidang ke bukai ti sama dikemeratka,” ku iya lebuh dikerandau dalam aum pengarang berita bekaul enggau taun ngenegapka orang indu.
Dulu ari nya, Fatimah ti mega Kaban Kunsil Nengeri (ADUN) Dalat nerima penemuai basa ari Gerempung Melanau Kuching (PMK) enggau Komiti e-DOK ba bilik baum besai Opis Menteri Penintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Anak Mit ba Bangunan Baitulmakmur ditu, kemari.
Iya madahka pengawa ngenegapka orang indu di nengeri tu dipejalaika begulai tauka dibaruh Opis Orang Indu enggau Ruang Bilik Sarawak (JWKS) ti dulu suba semina sebengkah unit.
Ketegal di meri basa ngagai orang indu nengeri tu, Kepala Menteri maya nya suba, Pehin Sri Adenan Satem ngangkatka unit nya nyadi JWKS, ku iya.
Nyerumba taun ngenegapka orang indu, JKWS mega deka mekuh ngagai bidang pelajar sereta ngenegapka institusyen ruang bilik laban tu amat beguna iya nya nyadi tulang belakang tauka nyukung orang lelaki ke nyadi ketuai ruang bilik.
Ngenegapka orang indu nengah undang-undang laban kitai deka nemu nama hak anak enggau ke bukai awakka orang indu enda diayah, ku iya.
Nambahka nya ku iya, kitai mega deka ngemeratka sereta ngenegapka orang indu nengah pengawa nyadi ketuai sereta ulih ngaga pemutus sekalika dalam sektor peribit tauka perintah, baka ti udah diaku ulih perintah.
“Kelimpah ari nya taun tu dalam atur deka ngenegapka orang indu, kitai (JWKS) ngemeratka bidang tauka pekara pengerai. Laban enti enda bepengerai tentu nadai ulih ngereja pengawa.
“Kitai deka beratika pengerai orang indu lebih agi penyakit ke enda berampit tang ngeruga baka jantung, kemi manis sereta darah tinggi,” ku iya.
Dikena ngenukuka semua bidang nya mujur, opis menteri tauka JWKS netapka tetiap bidang nya bisi Key Performance Index (KPI) ke diri empu.
Iya ngarapka opis bukai ulih mantu, nyukung tauka meri kerejasama laban JWKS enda ulih bejalaika kediri aja. #UtusanBorneo