 |
| ILLUSTRASYEN PICHA: Siku lelaki ti deka pulai ke menua ngena bilun, jalai alun enggau express. PICHA: @google |
KUCHING: Rayat Sarawak dilalau ngambika enda pulai ke nengeri tu maya musin pengerami ti deka datai taja kes kena rampit COVID-19 ngayanka trend ti nurun.
Chairman Gerempung Perubat Malaysia (MMA) pampang Sarawak Dr Morni Abu Samat madahka pemayuh rayat ti pulai ke nengeri tu dipelaba nambahka agi peluang kes COVID-19 ti baru lalu nya deka ngelemika sistem nyaga pengerai di nengeri tu.
“Pejalai entara nengeri enggau pelilih menua ulih digaga nyema bisi pekara ti berat enggau ngenyit kelebih agi maya musin pengerami,” ku iya madah nengah penerang nya kemari.
Dr Morni madah, kelimpah ulih nambahka risiko kena rampit ngagai ruang bilik enggau orang bukai dalam komuniti, empat makmal dikena ngaga pengawa mansik di Kuching, Sibu, Bintulu enggau Miri enda ulih napi gelumbang baru COVID-19, nyema penusah tu nyadi.
Beserimbai enggau nya, ungkup rayat Sarawak ti pulai ke nengeri tu kena kuarantin ba hotel tauka rumah mesti nitihka Prosedur Operasyen Standard (SOP) nya enggau penuh sereta penetap ti udah disediaka ungkup pengelikun sida, pia mega orang ti disayau, ku iya nambah.
“Atur Nagang Pemindah (PKP) udah ba minggu ketujuh, aku pechaya PKP deka terus dipejalai dikena nagang pengelekai sereta ulih nurunka kes baru COVID-19.
“Taja mayuh pelilih menua udah ba kategori Zon Gadung lalu penyampau kes baru ti diripot bisi nurun, ukai reti nya komuniti ulih pulai bejalaika normal lama dalam pengidup,” ku iya nyemetak.
Ku Dr Morni madah, seagi vaksin ti endang ngasi bedau diasilka, dipelabaka penambah kes baru ulih nyadi.
Nitih ku iya, lebuh PKP ditendu sereta diketu, semua raban ngembuan tanggungpengawa ngasika atur nyeliahka pengelekai baka seraka sosial enggau ngemeranka pemeresi jari dalam semua sukut kereja sereta rama.
Iya nambah, ungkup raban orang lunggar umur sereta orang ti sakit raya baka diabetes, tinggi darah, sakit tungkul ati, sakit lempuang, riman sereta ti berubat enggau sistem imunisasyen ti lemi endang ngembuan risiko ke tinggi kena rampit COVID-19 ke lalu ulih nabanka nyawa.
“MMA Sarawak ngarapka penendu PKP ari perintah deka diatur berenggat pengudah SOP dibantaika ungkup sektor pengereja pengawa. Komuniti enggau palan endur ngelantangka ati,” ku iya nandu.
Dalam pekara ti sama, Dr Morni madahka perengkaguna, pengelikun enggau rampa endur gawa semua pekereja nyaga pengerai mesti dijaga ninting maya ari raban bekaul.
“Sida mih tulang belakang dalam kitai belaban enggau COVID-19 lalu pengelantang enggau pengeransing sida patut dikemerat.
“Sida ti sakit tauka bisi ngembuan simptom mesti beperesa enggau lengkas laban kitai seruran betapi enggau risiko gelumbang baru COVID-19 ti nyangka ulih ngelemika sistem nyaga pengerai Sarawak.
“Jadi mih rayat ti ngembuan tanggungpengawa, lurus, ngasika semua undang-undang sereta atur ti bisi ba palan endur gawa enggau SOP bukai, nengah ulah ti ngasika semua tusun atur nyeliah tu, kitai ulih ngelaban pandemik tu begulai,” ku iya. #UtusanBorneo