 |
| Profesor Madya Dr Jeniri Amir |
Pemerati Politik Profesor Madya Dr Jeniri Amir madahka, kededua piak parti ti charut nya patut nerima enggau runding tebuka enda ngira nama formula tauka pemutus dikena mutarka penyarut.
Nitihku iya tang enda ulih teputar enti milih chalun terus BN jalai dikena mutarka penanggul tu maya Pengawa Bepilih Besai Ke-14 (PRU 14).
“Kenyau ari suba aku ngasaika chalun terus enda relevan dikena mutarka laban nya disema baka ‘pil penadol’ iya nya semina ngeraika penyakit sementara aja.
“Tang nya ukai jalai nyemetak tauka ukai chara pemadu engkeman dikena mutarka penyarut entara SUPP enggau parti baru iya nya UPP sereta entara PDP enggau TERAS,” ku iya lebuh ditelefon Utusan Borneo ditu, kemari.
Jeniri madahka, entara pemutus jalai iya nya kempang ngatur ke alai kededua piak nya nerima pemutus taja pan pait.
Ku iya parti nya patut nerima enggau tebuka laban enti enda baka nya, penanggul nya enda ulih diputarka.
“Iya ke deka ditemu ditu, naka ni BN Sarawak deka mutarka penyarut entara parti.
“Tiap kali maya bepilih, Sarawak betapi enggau pekara ti sama lalu enda kala ulih diputar...tang naka ni pengulih?,” ku Jeniri.
Apin lama Menteri Besai Datuk Seri Najib Tun Razak minta SUPP mutarka laya nya enggau UPP sebedau PRU14.
Ku iya, ti nyadi chaiman Barisan Nasional (BN), iya arap bendar Kepala Menteri Sarawak, Datuk Patinggi Abang Johari Tun Openg bisi formula dikena mutarka pekara nya.
“Aku minta pekara tu diputar. Aku pechaya Abang Johari bisi formula bakani deka mutarka sebadau PRU14, dikena nentuka SUPP sama tegap, nyadi SUPP ke siti,” ku iya lebuh bejaku bejadika pengawa nutup Aum Delegit Tiga Taun Sekali SUPP Ke-24 ditu, apin lama. #UtusanBorneo