 |
| Antonio Kahti Galis |
Presiden FORUM, Antonio Kahti Galis madah penyampau tubuh Orang Ulu diatu ke diau di mengeri enggau menua pesisir lalu sida mega begunaka ketuai komuniti.
Ku iya, FORUM nyadi gempung alai komuniti Orang Ulu beteduh lalu perambu ngambi ngenyampatka pengawa nyiri ketuai komuniti nya endang patut.
“Kitai udah berandau bekaul enggau isu nyiri ketuai komuniti ari Orang Ulu lalu FORUM endang ngarapka perintah numbuhka pangku pengawa tu enggau jampat,” ku iya rambau aum keterubah Eksekutif FORUM 2018 di Hotel Dynasty kena Hari Enam tu tadi.
FORUM mega ku iya meri terima kasih ngagai Kepala Menteri Datuk Patinggi Abang Johari Tun Openg laban ngemendarka peminta tanah dikena ngaga indu opis FORUM taun nyin tadi.
“Aku deka ngiring komiti pemansang indu opis FORUM begulai enggau bala kaban berindik ari iya deka dipejalai enda lama da agi,” ku iya nerang.
Berebak enggau nya, Antonio mega ngenang pemanah pengawa bala kaban FORUM ti mujur bejalaika bemacham aktiviti sepemanjai taun nyin tadi.
Ba lansa bukai, mandal presiden ke mega Kaban Kunsil Nengeri (ADUN) Telang Usan, Dennis Ngau meransang bala kaban FORUM meruan meri sukung ngagai pengari rayat sida ba tuju pengawa ngemansangka kandang menua sida.
Tambah mega, perintah udah mendingka peminta rayat enggau nyediaka subsidi perengka pengangkut, tung gis enggau ke bukai belalauka perambu FORUM.
Agenda besai aum tu dikena berandauka Aum Besai Ninting Taun (AGM) ti deka diatu kena 31 March taun tu di Hotel Dynasty.
ADUN Mulu, Dato Gerawat Gala ke mega nyadi Sapit Speaker Aum Kunsil Nengeri (DUN) dipelaba datai bejadika pengawa nya.
Lebih ari 100 iku eksekutif, bala pengari enggau pemerati ari semilan serakup di baruh gerempung nya dipelaba deka datai baum.
Semilan serakup iya nya Serakup Kayan Sarawak, Serakup Bisaya Sarawak, Serakup Nasional Sarawak Sarawak, RURUM Kelabit Sarawak, Petuduk Penan Sarawak, Serakup Lakiput Sarawak, Serakup Sarawak Berawen, Serakup Saban Sarawak sereta Serakup Lun Bawang Sarawak.
Sama bisi datai baum Sapit Presiden FORUM, Ipoi Datan enggau ADUN Murum, Kennedy Chuk Pai Ugon ke lalu nyadi Mandal Presiden FORUM. #UtusanBorneo