 |
| Raban bomba benung bejalaika operasyen ngerara enggau ngemadamka api ba palan penusah angus ke nyadi. |
MIRI: Siku lelaki orang tuai (warga emas) mujur nyelamatka diri ari penusah angus ke enda disadang nyadi ba rumah iya di Krokop 7, tang taja pia rumah ke diuan iya angus lengis diempa api tumu api pagi tadi.
Penusah nyadi urung jam 5.40 pagi nya, mansa beumur 73 taun diripotka selamat tauka nadai bakal ba sebarang alai endur tubuh.
Ketuai Bomba enggau Penyelamat Zon Miri, Law Poh Kiong, madahka raban bomba bisi nerima kangau bekaul penusah angus nya urung jam 5.43 pagi.
"Berindik ari ripot ke diterima, urung penyampau 17 raban bomba ari Balai Bomba enggau Penyelamat (BBP) Lopeng enggau BBP Miri berumban ngesah ke palan penusah ke nyadi ngambika ulih bejalaika operasyen ngerara enggau madamka api.
"Lebuh datai ba palan penusah ke nyadi, komander operasyen ngeripotka sebuah rumah setingkat struktur bansa enda entap angus lengis diempa api.
"Raban bomba pengudah nya alu bejalaika operasyen enggau api ulih dijaga urung jam 6.20 pagi," ku iya lebuh dirandau pengarang berita sehari tu tadi.
Ku iya, nitihka pansik tumu, rumah nadai sambung karan.
Ku iya, siku orang ke ngibun rumah nya diripotka selamat, tang taja pia enda ulih nyelamatka barang enggau dokumen ke diempu iya.
"Naka kediatu, raban bomba agi mansik penyampau pengerugi enggau kebuah penusah angus nyadi," tandu iya.