 |
| Gambar hujan batu. 📷#EricaDiane |
KUCHING: Peranak menua Kuching enggau Samarahan lemai tu tadi begau enggau fenomena hujan batu ke labuh dibeberapa endur baka ba Stutong, Tabuan enggau Jalan Dato Mohd Musa.
"Tu mih keterubah iya hujan batu nyadi batu ba menua kami ditu. Enda kala meda hujan baka tu laban fenomena tu jarang amat nyadi," ku siku orang ke penatai asal ari Stutong.
Kelimpah ari nya, di Samarahan siku orang ke ngena motosiksl tekenyit meda fenomena nyadi dipeda enggau mata iya empu. Iya lalu ngambi ai hujan ke nyadi batu ais nya enggau ditelan iya.
Ku iya, iya nelan batu ais nya laban teringka pesan orang tuai kelia madahka enti nyema nuan tauka barang sapa nelan ai hujan ke udah nyadi batu ais nya, sida deka bulih tuah.
Raban kami mega bisi nerima whatsapp ari siku lelaki dikelala enggau nama Man Gelam madah, beterabur ais di jalai besemak Airport Kuching tauka Stutong Baru urung jam 4.40 lemai tu tadi. Iya mega bisi ngirumka kami gambar enggau video pasal fenomena kenyadi ba rumah alai sida iya diau.
"Semetap munyi ais nya labuh ba atas kereta," ku Man nerangka pengarang BeritaIban.com