 |
| Sekeda ari lelaki (saspek) ke ditan polis lebuh bejalaika Ops Dadu, lemai kemari ditisi Jalai Pulau Kerto. |
SIBU: Dua belas kaki judi ti benung rinchah nyabung manuk ba tanah puang ditisi Jalai Pulau Kerto enda sempat ngelarika diri lebuh raban polis bejalaika abis ngenyit enggau mujur ngetan sida iya lemai kemari.
Lelaki beumur 26 - 70 tahun nya ditan raban polis Opis Tasat Jenayah (JSJ) Pampang (IPD) Sibu lebuh Ops Dadu dipejalaika urung jam 3.00 lemai nya.
Sapit Ketuai Polis Pampang Sibu, Superintendan Martin Koo, madah lebuh abis ngenyit dipejalaika seraban lelaki benung bediri sereta ngemataka manuk sabung benung bebintis.
Ku iya, polis mujur ngerampas enam iku manuk sabung agi idup enggau tiga iku udah parai, siti penimbang, sekeping papan rikod tuie tauka pasang manuk, taji mauk enggau mata duit RM113 ke dipechayaka kena sida bejudi.
“Raban polis D4 enggau D7 ti diuluka Inspektor Hairul Hussien enggau Inspektor Baharuddin Sabang pengudah nya ngerampas semua perengka guna ke dikena besabungka manuk enggau semua sida iya (saspek) dibai ke Balai Polis Sentral kena bejalaika pengawa nasat,” ku iya lebuh ke dirandau pengarang berita, kemari.
Martin madah, semua orang ke ditan nya dipechayaka peranak menua tu enggau diau enda jauh endur kelang sabung nya.
“Kes nya dipansik ari baruh "Seksyen 3(1)Akta Pencegahan dan Penganiayaan Binatang (Sabong Ayam) 1962".