 |
| Datuk Abdul Karim Rahman Hamzah |
Iya madah, nyema amat berita pemain bol menua tu ditemu ‘nyual’ pekit main bol ngagai orang bukai, tauka bisi kaul enggau ‘bookie’ sigi enda patut digalau agi.
“Nyema ditemu bisi kaul enggau ngatur main tauka enggau ‘bookie’, sida tu enda patut digalau dalam tim agi, tauka ditingkil,” ku iya.
Abdul Karim ke dikerandau pengudah atur pengawa Kongres Seni, ti dipenyadi Kepala Menteri Datuk Patinggi Abang Johari Tun Openg di sebuah hotel ditu kemari, dipinta nimbal bekaul enggau pemutus Kort Majistret kemari, ti ngelepaska (tang enggau jamin ari Opis Nagang Pengawa Makai Suap tauka SPRM) dua iku pemain bol Sarawak ari baruh FAS enggau siku ‘bookie’, ke sebedau tu ditan riman bekaul enggau kes ngatur main ba Liga Premier bedau lama tu tadi.
“Sigi amat sesiku orang nya enda salah, enti nadai bukti ke tegap mandangka orang nya bisi ngereja pengawa salah.
“Tang nyema pemain tu bisi kaul enggau ‘bookie’, pelaba aku pemain nya patut ditingkilka diri ari tim nya,” ku iya.
Kededua iku pemain bol nya diriman kenyau ari 15 Februari, dipinta mantu pengawa tasat nitihka seksyen 16 (a) Akta SPRM 2009 laban dipelabaka bisi ngatur main entara Sarawak enggau Felcra FC kena 10 Februari tu tadi.
Ba pekit nya, Sarawak alah 2-3, taja pan ba timpuh keterubah, Sarawak ngelui Felcra FC 2-0.
Berebak enggau nya, Abdul Karim ngelalau FAS majakka pengawa sida bepekit main bol sereta anang kelalu tusah ati beratika penanggul ke nyadi nya.
“Mayuh orang deka meda tim kitai tu (Sarawak) majak mansang, enda agi tinggal di belakang. Tu baru pekit ketiga, kitai udah mayuh penanggul ke baka nya.
Abdul Karim mega ditanya, sekalika penanggul nya nyad, ketegal pemain bisi napi penanggul gaji tauka insentif, alai sida iya ngatur main nya.
“Naka ke diatu, aku lalu nadai ninga sekalika penanggul nya nyadi ketegal gaji tauka insentif.
“Taja pia, orang ke ngatur main nya endang sigi bisi ati deka ngereja pengawa nya. Enti ketegal penanggul gaji tauka insentif (enti amat ketegal tu), ni naka pemayuh gaji tauka insentif ti diberi, enti orang nya kelalu rangka, tetap ngereja pengawa salah nya,” ku iya. #UtusanBorneo