 |
| Gambar pengias. |
MIRI: ketegal bini minta sarak, siku lelaki ke gawa ba ladang kelapa sawit, kempang ati enggau ngitang diri ba puchuk kayu, kemari.
Penusah nyadi urung jam 11.20 pagi nya, siku lelaki dipeda benung begitang ba puchuk kayu.
Berindik ari nya, bala staf ladang lalu madahka penusah ke nyadi ngagai bala pemesai ngambika ngangauka raban polis sereta bejalaika pengawa mansik.
Ketuai Polis Pampang Miri, Asisten Komisioner Lim Meng Seah, madahka bisi nerima kangau bekaul enggau kes siku lelaki, ditemu begitang ba puchuk kayu urung jam 3 lemai.
Mansa ke parai nya, dikelala enggau nama Jeffery Wan Joseph, beumur 26 taun, bansa kenyah enggau penatai ari Baram.
"Lelaki (mansa) nya lemi semengat enggau kempang ati ngitang diri ba puchuk kayu besemak ari ladang endur iya gawa pengudah seduai iya melaki bini belaya tauka saru penemu," ku iya.
Ku iya, sebedau penusah nyadi, mansa dipechayaka belaya enggau bini iya ketegal bini iya minta sarak.
Nithka penerang, mansa udah dua hari nadai nurun gawa enggau bangkai mansa dianjung ke Sepital Miri kena bejalaika pengawa buntas tasat.
"Nadai bekau jamah enggau jenayah ditemu ba palan penusah ke nyadi enggau kes tu diklasifikasi parai ngenyit", ku iya.