 |
| Saspek ditangkap maya abas ngenyit di sebuah apartmen di Kemaman urung jam 1.15 nyentuk 1.50 pagi kemari. |
KUALA TERENGGANU: Siku indu bulih untung penyampau lebih ari RM5,000 sebulan ari asil iya nyempit (servis seks) ke diberi iya ngagai lelaki idung belang ngaku diri tepaksa nyempit laban deka malas utang lebih ari RM50,000.
Indu ke beumur 33 taun nya mega ngaku diri ngena aplikasyen WeChat endur iya ngaga promosi tauka ngelakuka diri enggau rega entara RM250 nyentuk RM800 semalam.
Tang, pengawa ke digaga indu nya ditemu sepengudah ditangkap maya abas ngenyit di sebuah apartmen di Kemaman urung jam 1.15 nyentuk 1.50 pagi kemari.
Orang ke meri penerang madah, indu nya agi bujang sereta baru empat bulan aktif dalam pengawa nyempit enggau ngereja pengawa nya kediri aja.
Ku iya, sebedau ditangkap, indu nya madahka diri udah bulih lima iku pelanggan enggau asil peresa silik bisi beberapa bengkah bansa 'minyak pelincir' enggau tiga iti kondom udah dikena ba dalam tong uras besemak katil.
“Kelimpah ari nya, kami mega bisi tetemuka tiga iti agi kondom ke bedau dikena dilalaika iya ba dalam kasut.
“Indu nya madah, iya meri rega RM250 sekali ‘main’ enggau bisi bala pelanggan iya sanggup mayar sampai RM800 kena ngulihka servis ke digaga iya dalam semalam.
“Indu nya mega bulih untung penyampau lebih RM5,000 sebulan taja pan iya ngereja pengawa nya maya lepa,” ku iya.
Sapit Pesuruhjaya Jabatan Hal Ehwal Agama Terengganu (JHEAT), Mohd Azam Awi, maya ke ditanya raban pengarang berita, madahka indu ke nyempit nya udah ditangkap.