 |
| KASIH AMAT: Raban bomba benung ngemansutka Edward (tengah) enggau tu meh pendiau kerita ke ditepan seduai iya pengudah eksiden nyadi. |
MIRI: Siku lelaki parai tang anak iya diripotka bakal pengudah kerita ke ditepan seduai iya belantak enggau sebuah lori di Simpang Ngu, Batu Niah, Hari Enam tu tadi.
Eksiden nyadi urung jam 12 tengah hari nya, siku lelaki (apai orang), Edward Isau, 45 taun, ngapuska seput kepenudi ba palan eksiden ke nyadi tang anak iya, Zamri Edward, 7 taun, diripotka bakal.
Pengari Opis Operasyen Bomba Sarawak, madahka urung penyampau lapan iku raban bomba ari Balai Bomba Miri berumban ngesah ke palan penusah ke nyadi pengudah nerima ripot bekait enggau eksiden ke nyadi.
"Lebuh datai, siku lelaki diripotka agi mengkang ba dalam kerita enggau raban bomba lalu bejalaika operasyen mansutka lelaki ngena perengkaguna spesial.
"Urung pengelama sejam baru ulih raban bomba ngemansutka lelaki ke mengkang ba dalam kerita nya tang anak iya ti duduk ba endur penumpang udah dipansut orang mayuh ke bisi ba palan eksiden ke nyadi.
"Deriba lori nadai nenama tauka selamat," ku iya lebuh ke dirandau pengarang berita.
Bangkai lelaki nya udah disuaka ngagai raban polis ngambika ulih bejalaika pengawa mansik silik agi.