Komiti Begulai ngemujur projek di Sarawak deka ditumbuh
Cari Berita
Pun Laman › › › › ›

Komiti Begulai ngemujur projek di Sarawak deka ditumbuh

Admin | beritaiban@gmail.com
February 6, 2018
7:00:00 AM
KOMEN

Bacha Mega

BEJADI : Abang Johari (tengah) disempulang Subromaniam (kiba) enggau Sharifah (kana) bejadi Aum Direktor Kastam Se Malaysia di Kuching kemari.
Tu deka diarika raban ari Perintah Nengeri enggau Perintah Besai lalu perambu iya udah dikenatai ngagai Menteri Besai.

KUCHING: Kepala Menteri Datuk Patinggi Abang Johari Tun Openg madah perambu numbuhka Komiti Begulai entara Perintah Nengeri enggau Perintah Besai udah dikenatai ngagai Menteri Besai (PM).

Ku iya, komiti nya deka besaup ngaga lalu ngemujur semua projek di Sarawak nyengkaum pekara ke bekaul enggau belanja.

“Atur ngeluarka belanja sigi bisi birokrasi lalu tu meh pemar ke ditapi ba renggat nengeri.

“Pengawa ngagihka belanja lubah ketegal meseti nengah EPU lalu kekadang EPU enda nemu dini palan projek.

“Tu mih pemar, ambika chunto endur sekula ti deka diadu pan EPU enda nemu, kekadang sekula ti deka digaga nya ba tebing sungai, empat taun udah nya sekula melurut ke sungai,”ku iya.

Abang Johari mansutka jaku nya rambau bejadi Aum Direktor Kastam Se Malaysia di sebuah hotel ditu, kemari.

Komiti Begulai nya nitihka penerang Abang Johari deka mega dikena ba pengawa ngangkatmanah Opis Kastam di Sarawak.

Ku iya, Perintah Nengeri bedau lama tu tadi ngagihka RM2 juta dikena ngangkatmanah CIQ Kastam di Sungai Tujuh ketegal agih belanja ari Perintah Besai enda chukup.

“Diatu kitai bisi CIQ di Tebedu iya nya pintu besai entara Sarawak enggau kalimantan (Indonesia).

“Sapit Menteri Besai udah datai ke alai agih belanja ari Perintah Besai semina RM3 juta. Aku nyadang CIQ Entikong (Kalimantan) digaga nengah belanja RM150 juta.

“Belanja RM10 juta pan enda chukup dikena ngaga palan bas diak. Ketegal nya aku merambu Komiti Begulai ba pekara tu, belanja dikunsi 50-50,”ku Abang Johari.

Tajapan semua ungkus patut ditanggung Perintah Besai, tang kitai meseti nyendia perengka guna ke chukup ungkup raban Kastam, tandu iya.

Abang Johari nambah, pekara nya enda ulih dianti agi ketegal tau ngasuh orang dagang ngiga palan bukai ke lebih lantang sereta nyendia servis ke manah.

Bela datai Ketuai Direktor Kastam Dato Sri Subromaniam Tholasy enggau Direktor Kastam sarawak Datin Sharifah Halimah Tuanku Taha. #UtusanBorneo