 |
| SKOLARSIP: Siku penerima, nerima skrol skolarsip ari Sharbini (tengah). |
KUCHING: Sarawak Energy Berhad (SEB) taun baru tu deka nambahka penyampau ungkup skolarsip manggai RM8 juta dibanding enggau penyampau ke diatu ti semina RM5 juta aja.
Kaban Ketuai Pemesai Eksekutif SEB, Sharbini Suhaili madahka meri latih enggau skolarsip ngagai nembiak ke nyulut dalam pelajar endang pekara ti dikemeratka sida, kelebih ngemansangka rumah kuasa ke Sarawak ti udah dipejalaika dalam kandang berapa taun ti udah.
Kemari, SEB udah nyuaka skolarsip ungkup taun 2017 ngagai nembiak sekula nyengkaum pengereja pengawa ari SEB ke bisi nampung pelajar Palan Pelajar Tinggi (IPT).
Sharbini madah, taun tu bisi 99 skolarsip diberi kompeni nya ke nyadi sebagi ari pekara dikena ngemansangka pengelandik sereta penau rayat Sarawak kelimpah ngangkatka tikas pengelandik pengereja pengawa.
Ari semua ke nerima skolarsip nya, 85 iku nembiak Sarawak ke diterima nampung pelajar ba sekeda IPT, lalu sida ke bukai nya pengereja pengawa ari SEB empu.
“Kami (SEB) meri skolarsip tu ngagai bala nembiak ngambika sida ulih nampung pelajar laban beranakka modal dalam pelajar nya siti puku ti manah ke Sarawak ari diatu nyentuk ke jemah ila,” ku Sharbini.
Iya madah munyi nya lebuh bejaku ba atur pengawa nyuaka skolarsip ngagai bala nembiak sekula ke nyulut sereta pengereja pengawa SEB ke bisi nampung pelajar ngagai IPT ba sebuah hotel ditu,kemari.
Ku iya, nengah pemeri skolarsip nya, ngarapka ulih meri pengelantang ngagai bala nembiak ke pandai ari serata menua Sarawak nampung pelajar sida ngagai IPT.
“Kami ngarapka pemeri skolarsip tu ulih meri pengelantang ngagai nembiak ke datai ari ruang bilik ti kurang pemisi lalu SEB mutus deka nambahka ungkus skolarsip nya ba taun baru manggai ngagai RM8 juta dibanding enggau penyampau ke diatu semina RM5 juta aja,” ku iya.
Ku iya baru,pengawa nambahka peny ampau skolarsip nya mandangka komitmen SEB ba pekara ngemansangka rebak baru ngambika ng embuan mayuh pengelandik lalu ulih diambi gawa sereta nyatup pinta guna pengereja pengawa dalam kuasa.
“Program tu mega dikena ngangkatka agi pengulih SEB tetemuka, matak, ngempu, sereta ngangkatka penau ke kompeni tu ba juluk nyapai tagit kompeni.
“Dikena ngamatka pemerat kami nyadi sebuah rumah kuasa sereta pilih ke betul endur gawa,kami enda tau enda matak sida ke m ayuh pengelandik sereta ngemansangka pengereja pengawa ngambika ulih besemekih sereta nyadi ke pemadu nyulut di menua tu,”ku iya.
Program tu ke diberi kelala dalam taun 2014, udah mantu urung 314 nembiak ari serata menua Sarawak, lalu ari penyampau nya 212 agi mengkang enggau program tu.
Ba atur pengawa kemari,14 iti Skolarsip diberi ngagai pengereja pengawa SEB ti nampung pelajar sida ba IPT. #UtusanBorneo