 |
| Dato Sri Wong Soon Koh |
KUCHING: Parti Rakyat Bersatu (UPP) ngarapka bala ketuai tetinggi Barisan Nasional (BN) deka ngambi sekeda chalun ti diperambu sida ngarika gempung nya maya Pengawa Bepilih Besai Ke-14 (PRU14) ti deka datai.
Presiden UPP, Dato Sri Wong Soon Koh madahka Kepala Menteri Datuk Patinggi Abang Johari Tun Openg enggau Menteri Besai Datuk Seri Najib Tun Razak bela udah dipadah pasal chalun ti diperambu UPP bediri minta pilih nengah tikit ari baruh BN maya PRU14.
“Aku udah betemu enggau Kepala Menteri lalu apin lama ke udah bisi betemu enggau Menteri Besai. Aku udah ngelempaika pemutus ngagai bala ketuai tetinggi BN.”
“Anang betalatka sapa bagi chalun enggau sapa chalun ti ulih menang,” ku iya madah ngagai pengarang berita pengudah ngelancharka GDEX E-Commerce Hub and Linehal di Batu Kitang ditu, kemari.
Wong, ke mega Menteri Wang Kedua madah, ari perati UPP naka diatu, chalun ti dirambu enggau kaban sida udah gawa ba renggat kandang menua, chakah sereta gawaka rayat.
“Kitai ngarapka chalun ti diperambu kitai diakun bala ketuai BN ngambika ulih menang.
“Diatu, kitai ngelempaika pemutus ba Kepala Menteri enggau Menteri Besai kitai,” ku iya nandu.
Taja pia Wong, enggai madah bagi penuduk ti diining sida maya pengawa bepilih parlimen tu.
Taja pia, raban bepengelandik ba politik pechaya UPP ngining sekeda penuduk ti ari asal suba diungkupka ngagai Parti Sa’ati Rayat Sarawak (SUPP), kelebih agi penuduk majoriti China.
Penuduk asal ti diungkup ngagai SUPP iya nya Kuching, Sibu, Stampin, Miri, Sarikei, Lanang enggau Serian.
Kelimpah ari Serian, ti dimenang ari Datuk Richard Riot, SUPP alah ba semua penuduk ti diperebut sida rambau PRU13.
UPP diperati siti ari parti politik pemadu baru di Sarawak. Ditumbuh dalam taun 2014, parti tu iya nya parti politik ti pro-BN di Sarawak.
UPP iya nya tumbuh ari pampang SUPP, ditumbuh berin-dik ari penyarut ti enda teputar antara bala ketuai parti. #UtusanBorneo