 |
| KASIH AMAT: Bangkai mansa udah dianjung Ke Sepital Sibu enggau indai mansa diripotka betu pengudah penusah nyadi ba Rumah Panjai Chandi. |
SIBU: Siku indu Orang Timpang Pendiau (OKU) retung tang indai iya betu, lebuh penusah angus nyadi ba Rumah Panjai Chandi, Sungai Tau di Selangau, malam tadi.
Bangkai indu OKU (mansa) dikelala ngena nama Riti Jubi, 43, ditemu raban bomba retung ba baruh lamun arang di bilik ke diuan iya.
Indai mansa, Diah Bunyah, 80 taun, diripotka betu ba belakang tubuh enggau lengan kiba dianjung ke Klinik Selangau sebedau diperubatka enggau silik agi ba Sepital Sibu.
Penusah angus nyadi urung jam 8 malam, rumah panjai pemanjai 22 pintu nya angus lengis diempa api enggau ngejungka urung penyampau 300 orang ti nguan rumah panjai nya nadai palan endur ngenduh.
Lebuh penusah angus nyadi, semina mansa enggau indai iya aja bisi ba rumah panjai nya tang bala sida serumah udah ngesah ke sebuah agi rumah panjai laban enggau orang nyengaie antu.
Pengari Operasyen Bomba enggau Penyelamat Malaysia (JBPM) Sarawak, madahka Ketuai Balai Bomba enggau Penyelamat (BBP) Tatau, Nazari Harun begulai enggau tujuh raban bomba berumban ngesah ke palan penusah ke nyadi ngambika ulih bejalaika operasyen madamka api, pengudah nerima kanggau ari orang mayuh urung jam 8.25 malam.
Ku iya, raban bomba madamka api ba palan penusah ke nyadi ngena pam enggau ai parit ke semak enggau api ulih dijaga urung jam 11 malam.
"Raban bomba pengudah nya tetemuka mansa OKU ti retung nya urung jam 11.05 malam ba palan penusah ke nyadi," ku iya lebuh ke dirandau pengarang berita, sehari tu tadi.
Ku Pengari Operasyen Bomba, semua api mit mujur dipadamka urung jam 2.40 pagi enggau operasyen diketuka urung jam 6 pagi.
Bangkai mansa disuaka ngagai raban polis ngambika ulih bejalaika pengawa silik agi.