 |
| Logo Kaunsil Pemansang Bintulu (BDA) |
Pemantu Menijar Besai (Servis Rampa Menua) Kaunsil Pemansang Bintulu (BDA) Wan Ibrahim Wan Ali meri tangkan pemuntan pedagang nitihka atur nya tau ngujungka sida diukum nitihka undang-undang.
Iya madah munyi nya rambau randau enggau bala pedagang ke nadai lisin ba sebuah hotel ditu lemai ensanus.
Nya alai ku iya, program randau enggau bala tauke dagang nya betuju nerang enggau silik bidang teknikal enggau pekara ke patut dititih pedagang sebedau ngulihka lisin dagang.
“Ungkup rikod BDA udah tetemuka 46 premis rumah bemalam/hotel bajet, 24 premis kedai kopi enggau restauran sereta 17 premis masu gari ke mengkang beoperasi nadai belisin,” ku iya.
Iya madah, mayuh kebuah ngujungka peminta sida ditulak lalu sida meseti ngaduka baru laban nya beguna amat dikena ngulihka lisin sah ari BDA,” ku iya.
Wan Ibrahim madah, BDA diatu ngena atur berunding sereta nanya tauke bekaul sentang penanggul ke ditapi raban nya.
“Nyema sida begunaka penerang silik, sida semina ulih minta awak ke bukai lalu nama dikedeka kami ari sida iya nya meseti nitihka undang-undang.
“Kami enggau mejal sida, nyema orang bukai ulih minta, sida mega patut ulih lalu kami enggai mai sida ngagai kort,” ku iya.
Dialog tu ku iya, endang pelasar pemadu manah ungkup pemesai sida beteleba enggau pedagang lalu ngelala penanggul ditapi sida.
“Kelimpah nyeliahka mansutka surat tangkan kami mega ngarap nengah randau tu ulih nyelinting raban ke bekaul enggau ngasi,” ku iya. #UtusanBorneo