 |
| Datuk Francis Harden Hollis |
Kerejasama tu patut bisi berindik ari apai indai nyadi orang pemadu semak enggau bala anak, kelebih agi di rumah.
Menteri Muda Pengelantang Komuniti Sarawak, Datuk Francis Harden Hollis madah apai indai deka nyadi ‘pengajar’ bala anak di rumah sereta seruran nentuka bala anak sida berati baru pelajar ti diiri di sekula ngambi dikeingat maya di rumah.
Harden ke mega Kaban Kunsil Nengeri (ADUN) Simanggang mansutka jaku nya lebuh bejaku bejadika Lukean Legacy Ceremony, Sekula Sekondari (SMK) Saint Luke, Sri Aman di Balai Stonton sekula nya, semak ditu, kemari.
Nitih ku iya, tetiap apai indai bisi pangku pengawa sida empu nentuka pemanah pelajar bala anak seruran dikemerat, ukai semina di sekula aja, tang mega di rumah.
“Mayuh bala apai indai ngumbai pangku pengawa nyeridi bala anak dilempai ba bala pengajar di sekula, tang sida patut sedarka diri mega bisi tanggungpengawa besai di rumah, nentuka bala anak seruran ngemai pelajar di sekula ngagai rumah,” ku iya.
Pia mega ku iya, perintah nengah Opis Menteri Pelajar udah nyedia bemacham perengka guna kelebih agi dikena ngangkatka pemanah tikas pelajar menua.
Kelimpah ari nya, chara enggau gaya pelajar ti meruan mega diajar ngagai bala nembiak ngambika sida mereti agi lalu nerima penemu ti dikenatai bala pengajar sida.
Pia mega, Opis Menteri Pelajar udah nyediaka bemacham insentif mata duit mantu bala nembiak sekula ti begunaka bantu ngambika sida ulih rindang belajar.
Berebak enggau nya, iya mega ngelalau bala nembiak pintar ngena sebarang chara belajar ti bisi kelebih agi ngaul internet.
“Baka ditemu kitai, bisi sekeda ruai randau baka Facebook, WeChat, WhatApps, Twitter enggau ke bukai udah nyadi pelasar ngagai bala nembiak berandau enggau bala bakih.
“Taja pengamat iya pemisi pelasar tu manah, tang kitai enda ulih nyeliahka penanggul enda disadang nyadi nyema kitai enda bejaga, dataika bemacham ulah nipu raban ti nadai tanggungpengawa ngujungka pengguna komputer napi pengerugi,” ku iya.
Ku iya nambah, berindik ari mayuh bala nembiak diatu landik sereta nemu ngena komputer, iya minta bala apai indai matau ulah bala anak sida bekenaka komputer maya di rumah.
“Reti iya, apai indai meseti ngajar bala anak sida nyema ditemu salah guna komputer ba pengawa ti enda menuku, kelebih agi maya bekenaka internet.”
Sama bisi datai Prinsipal Sekula, Limok Shem, Penulung Kanan Pengatur Pengawa, Mura Abang sereta bala pengajar kanan ke bukai.
Rambau atur program nya mega, Harden bisi ngemendarka agih belanja penyampau RM50,000 ngagai PIBG sekula ungkup taun 2018 dikena sida bejalaika aktiviti ninting taun. #UtusanBorneo