 |
| KINI NUAN KA LARI: Picha tiga lelaki ke digaga raban polis di Sibu. |
SIBU: Raban polis benung ngaga 'spesil tim' kena nyidi enggau ngiga tiga iku agi raban Geng Joseph kena mantu nasat kes ngerumpak tauka enchuri rumah burung walet ba nengeri enggau menua pesisir di Sibu, ditu.
Sida tiga (suspek) ke digiga polis nya dikelala ngena nama Tadung Sawin, 31, Sayun Dawai, 49, enggau Jeffery Sulan, 42.
Kepala Polis Pelilih Sibu, ACP Stanley Johnathan Ringgit madah, operasyen khas bulan nyin tadi udah mujur nangkap ketuai (boss) geng nya, 33 taun enggau tiga iku agi kaban iya ti beumur 21 nyentukka 41 taun.
“Naka kediatu, semua sida iya (suspek) benung ditan reman enggau pengawa mansik agi dipejalaika nyengkaum bejalaika pengawa tasat deka nemu dini endur sida iya ngaga ulah tauka jenayah,” ku iya madahka maya aum media, kemari.
Ku Stanley, asil pengudah nangkap sida raban polis ngerampas sebuah kerita, sebuah gitar, sebatang pengikis, siti talipaun binching enggau penyampau semua rega urung RM20,000.
Ku iya, Geng Joseph ngena 'mondus operandi' milih rumah rumah sarang burung ti ba endur luar nengeri Sibu lalu enchuri enggau ngerumpak bebala mayuh.
“Geng nya mega bisi mai perengka baka tukul, duku, pengikis enggau lampu pichit kena sida iya enchuri enggau ngerumpak.
“Asil tasat tumu, geng nya deka balat ngeransi (agresif) enti nyema sida iya bisi tetemuka orang ke nyaga rumah sarang burung (victim) enggau nanchang orang ke nyaga rumah burung nya ngena tali, nyamah sereta ngemba tudah ngena utai tajam baka duku,” ku iya.
Ku Stanley, geng nya suah bejalaika ulah ti enda menuku nya (aktif) maya malam enggau tumu pagi kelebih agi maya Atur Mindah Besekat (PKP) agi benung diteritka.
Ku iya, nya mega kebuah orang ke ngembu rumah sarang burung enda ulih ngabas kia laban pejalai sida iya bisi taka tauka enda ulih bejalai jauh.
“Kelimpah ari nya, geng nya mega dipechayaka udah ngereja abis nadai enam kes enggau lima ari kes nya pecah, enchuri sarang burung tang siti agi kes ngerumpak sarang burung,” ku iya.
Ku Stanley, penyampau ke semua pengerugi kes tu abis nadai urung RM53,400.