 |
| Gambar Pengias. |
SARATOK: Siku lelaki (orang tuai) nyambut Hari Merdeka dalam lokap ketegal kelalu kanji.
Saspek, lelaki beumur 67 taun ditangkap polis ba sebuah rumah ditu sepengudah apai siku anak mit, indu, beumur sembilan taun ngaga ripot madahka anak iya kena pasung lelaki nya.
Ketuai Polis Pampang Saratok, DSP Mordani Tanin, madahka polis udah nangkap lelaki nya (saspek) enggau direman pengelama 7 hari belabuh ari kemari (30 Ogos) nyentuk ke 5 September 2018 kena bejalaika pengawa mansik silik agi.
“Nitihka ripot polis ke digaga apai mansa, kena hari dua tu tadi, urung jam 8 malam anak iya benung bejalai pulai ke rumah. Maya mansa benung bejalai, mansa ditarit saspek enggau mai iya ke rumah saspek lalu dia mih, saspek masung mansa,” ku iya maya ke dirandau pengarang berita kemari.
“Tang anak mit indu (mansa) nya, mujur ngelarika diri enggau pansut nengah pintu belakang rumah saspek,” ku iya.
Berindik ari ripot ke digaga apai mansa, raban polis ngiga saspek enggau mujur nangkap saspek ba rumah iya empu, kemari.
Nitihka penerang ari peranak menua nya, saspek bisi 'kedai runcit' enggau diau kediri ba rumah laban bini iya buan uchu ba rumah sebengkah agi (rumah anak iya).
Ku Mordani, mansa dianjung ke Sepital Sibu ngambika ulih diperesa enggau diperubat silik agi.
Kes dipansik ari baruh Seksyen 14 (a) Akta Kesalahan Seksual Tehadap Kanak-Kanak 2017, saspek ulih dijil enda lebih ari 20 taun enggau sipat, enti nyema dikenuku salah.