 |
| ACP Stanley Jonathan Ringgit |
Siku lelaki ditemu parai ba bilik suwa iya di tingkat 2 sebuah rumah kedai di Jalai Lebuh Tinggi, Sibu, lemai Hari Satu tu tadi.
Tudah lelaki ke parai nya beumur 48 taun, orang ari menua Indonesia ditemu orang ke ngempu rumah kedai (landlord) parai urung jam 3.30 lemai lebuh orang ke ngempu rumah kedai deka ngambi duit suwa bulan bilik ari tudah lelaki nya.
Ketuai Polis Pelilih Sibu, ACP Stanley Jonathan Ringgit madahka, asil pansik tumu nadai abi jamah ba tubuh lelaki nya enggau semua keresa iya agi bisi dia tauka agi baka selama.
Ku Stanley, asil peresa lutur di Sepital Sibu mega madahka, nadai bakal ba tubuh tudah lelaki nya.
“Kami pechaya tudah lelaki nya udah parai 10 jam sebedau iya ditemu orang ke ngempu rumah kedai nya,” ku iya.
Stanley mega madah, polis udah madahka pekara nya ngagai konsulat Indonesia di menua tu ngambika sida iya ulih ngiga bala kaban belayan ke semak enggau tudah lelaki nya sereta kena bejalaika pengawa silik agi.