 |
| GAGA AMAT: Anak mit begambar enggau perengka sekula. #MamaJueStory |
Apai indai berunding sereta merambu bebelika barang baka baju enggau tanchut sekula, beg, kereban tulis, bup kelimpah ari bebayarka yuran sekula, pemeri Gerempung Apai Indai enggau pengajar (PIBG) enggau bayar tambang van sekula anak sereta ke bukai.
Lalu maya tu mega apai indai udah bisi atur belanja lebih agi diatu ungkus belanja sereta pengidup ti majak nambah senutuk enggau rega barang ti enda meruan tau mar.
Enti nadai atur belanja ari pun, nya deka ngeruga belanja ruang bilik lebih agi enti ruang bilik nya semina bepanggai ba seiku aja ke gawa.
Siku indai ngagai dua iku anak, Janies Henry,32, madahka tiap taun iya ngungkupka belanja dikena bebelika barang sekula, ngambika belanja berasai lempung.
Janies madahka taun tu belanja bebeli barang sekula lebih besai dibandingka enggau taun sebedau tu berindik ari bisi sekeda barang nya udah niki rega.
Iya madahka diri nyekat sereta ngatur belanja enggau manah lebih agi bulan Disember mega ngintu pengerami Hari Krismas.
“Ba aku ke bisi dua iku anak iya nya sekula primary enggau sekondari endang berasi berat taun tu laban bisi sekeda rega barang baka kasut, baju sekula enggau kereban sekula ti mar. Semina sepasang siku aja barang ke dibeli.
“Ungkus belanja endang tinggi. Kelimpah ari bebeli barang dikena sekula, bisi mega bebayarka yuran sekula sereta yuran bukai ke patut dibayar maya ngerejista anak masuk sekula. Yuran sekula sekondari lebih tinggi dibandingka enggau sekula primary.
“Aku bisi ngagihka penyampau belanja sekula lebih agi pun taun iya nya maya masuk sekula baru. Ke siku anak aku ngagih belanja urung RM500. Lalu belanja tu udah disimpan tumu kenyau ari bulan November dikena nyeliahka ari berasai berat ba belanja,” ku iya ti gawa nyadi kerani.
Lalu seiku indai ngagai empat iku anak, Nur Aisya Sofea Asan, 37, iya ngungkupka belanja urung RM1,000 ngagai tiap iku anak dikena nyendiaka barang ke dikena maya berengkah sekula taun 2018.
Lain ari orang bukai, Aisya selalu iya bebayarka yuran anak sebedau kemisi sekula ngambika enda kelalu berat ba belanja maya bebelika kereban sekula.
Laban anak tuai iya masuk Pom Satu dia belanja lebih besai agi berindik ari ke bepungkal semua barang, ku iya, seraya ngarapka Bantu Rayat 1Malaysia (BR1M) ulih diberi tumu agi.
“Enggi aku, yuran anak segi dibayar sebedau kemisi sekula. Agih belanja dikena meli barang sekula ke seiku anak urung iya RM1,000 nyengkaum mayar bup sekula sereta yuran komputer enggau ke bukai.
“Seiku anak dibeli dua pasang baju, tancut sereta kasut enggau ke bukai. Laban beg agi manah sida iya nadai bebelika beg sekula.
“Ba aku taun tu bisi berasai besai agi belanja laban anak aku ke tuai masuk Pom 1 sereta semua barang dikena sekula nyengkaum baju sereta tanchut sekula endang bepungkal baru magang,” ku iya. #UtusanBorneo