UiTM Mukah deka muka kursus ‘Degree in Herbs Production’
Cari Berita

UiTM Mukah deka muka kursus ‘Degree in Herbs Production’

Admin | beritaiban@gmail.com
September 2, 2011

KUCHING: Universiti Teknologi MARA (UiTM) pampang Mukah, Sarawak deka nyendiaka kursus baru ‘Degree in Herbs Production’ sepengudah pengawa ngaga palan kampus nya tembu.

Rektor UiTM Sarawak, Prof. Dr Jamil Hamali madahka pengawa ngaga kampus Mukah nya deka berengkah ba pun taun 2012 lalu disadang deka nerima penatai urung 2,000 iku pelajar.

“Bengkah kursus ke baru “Degree in Herbs Production” deka disediaka ba kampus Mukah sepengudah pengawa ngaga palan nya tembu.

“Tu deka meri pengelantang ngagai pelajar UiTM ke ngambi progrem ‘Diploma in Planting Management’ nyambung pelajar sida iya ngagai renggat degree,’ ku Jamil.

Nengeri Sarawak chukup besai ke ngembuan mayuh asil kampung ke tau dipansik sereta dikemansangka nyadi pemakai tauka ubat dikena ungkup tuju ba pengerai, tandu iya.

Iya mansutka penerang tu ngagai pengarang berita ba pengerami rumah tebuka nyerumba ngintu Hari Raya ba rumah iya di Siol Kandis ditu, kemari.


Dr Jamil mega madahka ba renggat keterubah, progrem nya deka ngambi urung 30 iku pelajar lalu deka dikerembaika belubah.

Pengawa bejadika tanah kampus Mukah udah dipenyadika Kepala Menteri Pehin Sri Abdul Taib Mahmud kenaka 9 April 2011 lalu mungkur tanah ba pemesai 500 ekar.

“Kampus Mukah ditumbuh ngambika tau ngadaka orang ke landik dikena napi pemansang ke nyadi ba kandang endur nya.

“Menua Mukah kena bungkur projek SCORE lalu progrem ke disediaka UiTM patut ulih napi peminta pengereja pengawa ari projek nya,” ku iya.

Pengawa begaga kampus nya disadang tembu dalam timpuh tiga taun lalu ditaga nyendiaka mayuh macham program pelajar ke nyengkaum ‘Business Management’,’ Applied Sciences’ enggau ‘Plantation and Agro-technology’.

Jamil madahka UiTM Sarawak seruran ngatur kerejasama enggau universiti bukai serata Borneo lalu ba bulan Oktober tu UiTM enggau Universitas Mulawarman (UNMUL) Samarinda (Kalimantan Timur), Indonesia deka ngatur Konfren Entarabansa Islam Borneo IV.

“UiTM deka ngatur kerejasama enggau universiti bukai ngatur Konfren Entarabansa Islam Borneo IV ba palan UNMUL bulan Oktober tu lalu urung 300 iku orang disadang deka datai ninga ka konfren nya,” ku iya. -BorneoPost