Menteri Pengawa Berumah enggau Pemansang Dalam Nengeri ti nyadi Sapit Presiden Parti Pesaka Bumiputera Bersatu (PBB) Datuk Amar Abang Johari Tun Openg madahka parti nya deka mantaika orang biak sereta bepengelandik endang sepekara ke patut dikereja kena meri awak ngagai sida nyadi tuai.
Iya ke lalu nyadi Kaban Kunsil Nengeri (ADUN) Satok madahka nya dikena napi ubah ke majak mar jemah ila.
Nambahka nya, pekara tu diatur dikena nambahka penemu sereta ngemenuhka peminta raban nembiak menua tu, ku iya lebuh dikerandau pengarang berita ba Rumah Tebuka Hari Raya iya ke diatur ba Sri Minangkabau II ditu, kemari.
Lebuh ditanya Datuk Seri Mahmud Abu Bekir entara chalon baru nganti Dato Sri Sulaiman Abdul Rahman Taib ba PRU ke-13, iya madahka, agi kelalu tumu endur nentuka sapa, tang senaya orang ke biak ti ulih nyadi ketuai endang mayuh.
“Baka pengawa bepilih besai nengeri apin lama, kitai endang deka mantaika orang biak ba PRU, laban tu endang sebengkah proses dalam parti, orang biak diberi awak nganti penuduk orang bisi diatu.
“Laban kitai dekaka bisi orang nampung, nya alai ketuai ti ngiring iya nya orang ti bepengelandik sereta bisi peneleba ngambika ulih napi pemar jemah ila.
“Reti iya kitai dekaka input baru (orang biak) kelebih agi kena napi peminta raban nembiak, laban rayat ba Sarawak urung 60 persin ke beumur baruh ari 50 taun,” ku iya.
Ngenang pengawa bepilih ba menua Singapura, Abang Johari madahka Singapura ke diurus sereta diatur enggau manah ngelama tu mega napi ubah landskap politik iya nya presiden menang enggau majoriti mimit, 70,000.
Nya alai ari nya kitai ulih beratika, orang biak patut diberi awak sereta diajar ngurus enggau ngatur menua ngena chara baru, kena nitihka peneka rayat, ku iya.
Kelimpah ari iya madahka diatu sida (BN) benung ngemataka pemanah pengawa ke dikereja genap iku Kaban Parlimen.
Taja pia ku iya sapa bagi chalun deka diputuska Majlis Kerja Tertinggi (MKT) ke deka baum sebedau pengawa bepilih diatur.
“Chalun ke nyadi pengari (BN) kena napi PRU deka ditemu pengudah aum MKT iya nya entara Presiden, Sapit Presiden enggau kaban MKT,” ku Abang Johari nandu baru madahka endang dipelabaka bisi orang baru. -BorneoPost