Updated : 1:27 pm March 27, 2009KUCHING: Ngaga rumah jemah ila ngena konsep siruka rampa menua laban diatu menua Sarawak mupuk nguing kediri ngagai adab ngaga pemansang rumah alai orang mayuh diau ngena konsep nya enggau komuniti interaktif.
Menteri Pengawa Berumah Datuk Amar Abang Johari Tun Openg madah konsep nya deka nyerangkung perengka rekreasi baka padang tebuka ke gadung ba estet rumah orang mayuh diau.
Iya madah ngena konsep siruka rampa menua mega deka ngena komponen ngelimat kuasa baka ngena matahari ba landskap siti teknologi ke baru ari menua China ke semina dijual enggau rega RM250 ke ulih kena nyadi lampu luar rumah.
“Konsep baka tu kitai ulih ngena matahari kena landskap luar rumah, siti teknologi ke baru ti digaga ari menua China. Lebuh kitai ngena solar matahari tu, kitai enda ibuh ngena minyak tauka karan.
“Kelimpah ari nya, menua Sarawak mayuh barang mata kena ngaga perengka tu. Kitai semina mai teknologi masuk kena nyukung barang gaga kitai.
“Kami mega deka beratika estet rumah alai orang mayuh diau di menua tu ngena komponen rampa menua kelimpah ari nyendiaka pelin ke manah nyengkaum pendiau siruka rampa menua,” ku iya madah udah bejadi Building Trade Show ba Taman Kereta, kemari.
Abang Johari mega madah diatu raban arkitek benung berunding ngaga rumah ke nyukung konsep siruka rampa menua laban orang mayuh kemaya hari mansang ransing ati ba isu pasal rampa menua.
Presiden Pertubuhan Arkitek Malaysia (PAM), Lee Chor Wah madah sida iya benung ngelatih bala arkitek enggau injinia mantu kompeni ngaga rumah ngena konsep siruka rampa menua.
Kelimpah ari nya, sida iya mega deka matih orang ke deka netapka pengawa nya nitihka stindit sistem indeks entarabansa beratika rumah nya ngena konsep siruka rampa menua tauka ke enda.
Di Malaysia, bisi sekeda rumah digaga nitihka konsep siruka rampa menua, siti ari nya baka rumah Suruhanjaya Keselamatan di Putrajaya. Tang di menua Sarawak tu aja, nadai mayuh ngena konsep baka nya, taja pia kami ngasuh pemaju ditu nitihka konsep nya.
“Kediatu kami bisi 10 bengkah projek keterubah ngena konsep siruka rampa menua, tang mayuh agi deka dipelin ngena konsep nya. Bisi sekeda udah ditetap nyenggala siruka rampa menua tang digred orang ari menua baka ari Amerika Syarikat enggau Singapura.
Bejaku pasal ungkus, ku Lee siti kompeni Australia madah sida iya nampung kos 2.5 ngagai 3.0 peratus enti ngena konsep siruka rampa menua.
“Ba menua tu pelaba aku kitai beguna 3.0 ngagai 5.0 peratus enti deka ngulihka tikas ke tinggi,” ku Lee.
Lee madah, iyaketerubah iya diberi kelala begunaka mudal ke besai, tang ba timpuh ke panjai ngena kuasa deka dikurangka lalu mayuh agi kos kuasa ulih dikelimat.
“Konsep siruka rampa menua manah kena ngurangka kuasa lalu ulih ngasuh rumah chelap agi kelebih agi ulih ngelimat duit sereta nyelamatka rampa menua,” ku iya.
Lebuh bekenangka projek, Johari madah semua projek perintah deka terus dikereja nitihka perambu nyengkaum ngaga projek ba Koridor Kuasa Tau Kena Baru Sarawak (SCORE) ke begunaka orang ari industri berumah ba 10 bengkah industri berat, nyengkaum ngaga palan industri, infrastruktur, komersil enggau ngaga alai orang diau.
“Kami ngarap projek pemansang terus digaga kelebih agi ke bisi dalam perambu enggau projek baru baruh pakej penyungkak ekonomi awakka terus tegap.
“Projek baka tu kelimpah ari ke bisi dalam perambu ulih ngurangka penusah rayat ulih mega nyukung kompeni betunga enggau ekonomi ke enda berapa manah diatu.
“Aku ngarapka pengawa baka tu sama-sama ulih kereja kompeni enggau gerempung professional ngatur pengawa tu ba maya ke betul baka kediatu,” ku Kepala Menteri Pehin Sri Abdul Taib Mahmud ba teks jaku iya maya muka Building Trade Show ke diatur Pertubuhan Arkitek Malaysia Pampang Sarawak (PAMSC) ke dibacha Menteri Pengawa Berumah, Datuk Amar Abang Johari Tun Abang Haji Openg ke deka dibuka empat hari belabuh ari kemari.
