Updated : 1:27 pm March 27, 2009
Ulih Anya Kedap
Penemu tu suah diseliah laban nangika orang nemu pemaruh pendiau aki ini menya
Tuai penama Mathew Banyin Nyaru, ari Kedap, siku kitai Iban ba menua Batang Krian di Saratok ke landik betusut, gaga bendar ati lebuh penulis tu ngerandau iya sepagi bekenang ka tusut apin lama.
Banyin, petunggal apai penulis dua kali sereta tiga kali petunggal enggau indai iya, ukai mina landik betusut, tang mega landik bebiau, begeliga, ngansah sereta bejaku ba pengerami kitai Iban, mina iya enda landik benyawa baka berenung, nimang jalung tauka penemu benyawa ke bukai.
“Mayuh kitai Iban enggai tauka malu enti orang betusut, laban takutka ditemu orang baruh pendiau aki ini kelia, nyengkaum sekeda ke nyadi ulun orang. Nya alai enti lebuh maya bisi pengerami belaki bebini, iya nya atur melah pinang, sekeda apai indai mayuh madah enda nemu tusut, tang kebendar, sida engka bisi utai kenangi. Tu nyengkaum enggai ka pemaruh pendiau aki ini sida ditemu orang, baka sekeda ke kala nyadi ulun orang dulu menya,” ku Banyin, ke mega madah penemu betusut tau mega kena ngiga kaban belayan.
Enda nya bula, tang mayuh agi orang ke madah enda nemu betusut nya endang amat enda nemu, ukai tegal bisi utai dikenangi tauka utai dikemalu tauka bisi utai deka dilalai. Kebuah pia, penemu betusut tu jarang dikembuan.
Kami sebuat di Batang Malupa, engka tinggal Banyin enggau siku agi bala bukai, iya nya Ipit Mansur di Tanjung Sikup ke nemu betusut. Niang indai penulis menya pama ga penemu tang agi jauh endar tinggal. Pia mega sida bukai ke udah nadai agi baka niang aki aku Ngelambai, tang nadai datai ba penemu Banyin, laban iya tu aris niang aki Chil bala kami penama Magat. Niang Magat menya sigi ditemu landik betusut.
Sida ari menua Rimbas ke landik betusut nya tuai niang aya Pengulu Henry Ganja ke baru apin lama udah nadai. Niang aya Pengulu menya suah endar betangkup enggau Banyin enti bala orang Malupa tauka Batang Krian bisi betampil enggau bala ari Rimbas. Sekali dalam taun 1984 lebuh bisi orang dua iku jadi melaki bini di Sibu – enda ibuh disebut nama orang ke jadi nya – seduai (Banyin enggau Ganja) sama diambi betusut.
Nyinuk endar bala sida Batang Rajang ninga seduai betusut, laban pengawa betusut jarang dikereja orang menua nya, ka tambah ke tebal agi sida enda nemu.
Maya nya agi idup bala sida niang YB Joseph Kudi, niang Temenggong Sandah, niang Senator Joseph Unting ke sama bela bisi datai ba pengerami nya ka tambah mayuh ari bukai, ke tebal agi bala ari menua Saratok, Debak enggau Betong.
Empa pengelandik seduai nya ke betusut indu enggau lelaki ke melah pinang malam nya kena 8 Disember, 1984 dipetusutka ari sepiak-sepiak. Ari apai indu enggau apai lelaki seduai mina lima kali petunggal, lalu ari indai indu enggau indai lelaki, seduai semilan kali petunggal.
Nya alai lengka senentang nya, enti bala Iban dulu kelia deka belelang, sida mesti enda tau enda nemu mimit tusut diri. Anang tak mina nemu naka aki enggau ini ichit ari sepiak-sepiak aja, tang nemu dalam agi ngagai abis kurang ngelima ngenam serak tubuh aki ini diri.
Kebuah pia, laban enti sida nemu betusut, sida mudah agi bulih kaban, lalu mudah agi ngentapka diri ba siti-siti alai, laban bisi kaban belayan endur diau. Tang enti enda nemu betusut, tauka lubah tetusutka kaban belayan, orang ke belelang nya bisi deka pedis mimit diterima orang diau ngampar ba menua siti-siti.
Nyadi kemaya haritu, taja pan pengawa ngintu tusut nya nyau udah dibuai ukai tegal enda rindu, tang laban nyau udah nadai agi orang ke mengkang ngembuan tusut, nadai ga kebuah kitai tau nejuka penemu nya tebuai pia aja.
Ukai nya mina tegal laban enggai enda nemu sapa aki ini, tang laban kitai ke idup tu enda tau enda nemu kaul kitai enggau bala kitai Iban ari ai bukai ke bisi tali darah.
Ambika banding, mayuh bala Iban di Temburong Brunei nya datai ari menua Layar di Betong, bisi mega datai ari menua Batang Ai ke endang keterubah alai kitai Iban terengkah lebuh baru melunggang ari Batang Kapuas kelia ngagai menua Sarawak.
Anang ka sida di Temburong, bala di Julau enggau Kapit pan mayuh berasal ari menua Layar dulu menya, ambika banding bala sida Temenggong Jinggut (Kapit) enggau niang Datuk Temenggong Banyang (Julau) sebilik.
Semua utai tu endang amat, kelebih agi enti bisi tusut ti meruan kena netapka pengamat iya.
Nadai lebih ari nama orang tuai kelia enggau nama nembiak baru diatu ke nyadi pengayan terang netapka pengamat orang nya bisi kaul darah enggau pangan diri.
Kitai sama nemu, nama Iban endang betampung laban adat ngangkat nama aki ini. Ambika banding, nama Muahari tauka Moahari nya nama orang tuai ba Batang Layar menya. Bala orang ke ngangkatka nama nya, reti nya bisi aki ini nama nya. Sebarang sapa ke sama bisi anak nama nya reti nya sida ke empu anak nya engka bekaban enggau diri sama diri.
Ambika banding, menua Batang Krian, mayuh endar orang nama Endawi, Kadam, Renggi, Kilat, Gelungan, Saban, Entinggi, Naing tauka Naga. Tang jarang ninga menua Batang Krian bisi nama Gerinang, Taring, Bangau, Selan tauka Ugap. Tang di menua Batang Rajang, nama ke disebut nya mayuh endar ditemu. Kebuah pia, laban sigi endang ngangkat nama aki ini diri empu.
Taja pia bisi mega nama ke ditemu mayuh diangkatka orang ba semua batang ai, ambika banding nama Chendang, Jawi, Linggi, Enjop, Unting tauka Jimbun sereta mayuh nama bukai. Nya ngayanka sida engka bekaban, lalu engka sama ngangkatka Chendang tuai, Linggi tuai sereta Jimbun tuai kelia.
Beduduk ari tu meh kitai Iban anang ngelengka nama asal etnik Iban enggai ka pengelala Iban nya nadai agi.
Lebuh penulis ke berandau enggau raja pengkebang kitai Iban, iya nya niang Dunging anak Gunggu di pasar Sarikei dalam taun 1982 kelia, maya penulis agi ngajar ba Maktab Perguruan Rajang di Bintangor, orang tuai nya keran madah diri endang peturun Singalang Burung, nya alai iya ngaga nama sekula alai iya ngajar urup Dunging di Nanga Ulai nya Sekula Sera Gunting.
Kebuah pia, laban ngangkatka nama uchu Singalang Burung penama nya, iya nya anak Dara Tinchin Temaga seduai Menggin. Dara Tinchin Temaga tu anak tuai Singalang Burung. Di menua asal sida, Dara Tinchin Temaga tu belaki ka Ketupung, iya nya siku ari burung ti ambi ka burung dalam dunya beburung kitai Iban dulu kelia.
Penulis enda nemu tusut Dunging ari Sengalang Burung, tang ngena awak tu, kitai tau meda penyauh kitai ngempit tauka ngejang ari pangan diri ari kita meda tusut kami sebilik ari antu, ngagai Singalang Burung, ngagai tubuh bala anak diri ke diatu, baka ke entudi tu.
Patu Pejuru Ulup Selampur Banan bebini ngambi Dayang Bangi ti Betanggi Ayung Langit, Kumang Bisi Pemandang Tukang Tau Tilit, beranak ka Abu, berumah di Munggu Tinggang Guntur. Iya bebini ngambi Dayang Saur Landik Ngukur Mata Isau Pengundur Bala Nyerang beranak ka Nising Berumah di Tinting Pandang Lambur.
Iya bebini ngambi Dayang Linja Penyaga Pua Bali Berandau Penyandik Leka Balang Berang beranak ka Bedang Bungkuk Belakang Pemandang Batang Tiang Bediri Taja Rembi-Rembi Kena Pandang Leka Balang Beranggung ke bebini ngambi Bandai Rampai Punggai Sebangki Sandi Kaki Tangga Jejabung beranak ka Aki Lang Buban Ngembuan Leka Mudan Seperugan Ringka Gantung, lalu bebini ngambi Tanga Tali Bediri di Kaki Tiang Sandung lalu beranak ka Orang Tuai Bejuluk Lumpung Tigai Nadai Begapung, Aki Lang Singalang Burung Bejuluk Pandung Renggang Sundang Surung ke bebini ngambi Indai Kechendai Lawai Pantak Jirak Dara Sentaba Balun Kupak Sandik Anak Tunggang Jejabung.
Angkat dek tak renga pedera enda nyamai tabin tebirin lembau makai meh Indai Kechendai tu lalu dipelianka Jaban Betawai ka Gendai, pindahka nama ngagai Endu Sudan Berinjan Bangkung Endi Diu Tiung Menyelung.
Nya baru iya nyera pelangka dada, ngandut di perut ngandung di punggung lalu beranak ka Endu Dara Tinchin Temaga Endu Cherebuk Mangkuk China belaki ngambi Ketupung.
Tinggal Ketupung ke belelang ke Punggang Remang Nyerapung ngiga gerunung siung kena ngelapak padung paya berimban, tinggal Ketupung bekubu ka Punggang Remang Biru ngiga baju beludu chelum ngelepu entilan sawan iya belaki ngambi Menggin @ Ming beranak ka Surung – bisi mega disebut Sera – Gunting bebini ngambi Surung Ngiang beranak ka Entali Bunga Ngambi Aka Dara Lantau Sekumbang @ Surung Kempat bebini diambi Ranjau lalu beranak ka Riduh ngambi Ali – bisi sekeda tusut madahka Riduh diambi Bada) beranak ka Gupi ke belaki diambi Bujang Belang Pinggang beranak ka Beragai ngambi Chundau beranak ka Beti ngambi Duri beranak ka Talak ngambi Pandak beranak ka Jawat ke belaki ngambi Gedur beranak ka Gendup lalu ngambi Ujur beranak ka Dunju ngambi Indit beranak ka Mara ngambi Tumi lalu beranak ka Dap ngambi Jenun beranak ka Tapa ngambi Ingkat beranak ka Sarung ngambi Tatal beranak ka tujuh iku menyadi iya nya Medang, Janang, Galau, Nain, Radin, Ayai enggau Anggat (mati bujang).
Tusut penulis tu ari Medang ke bebini ngambi Rendung beranak ka Edek, Buma enggau Tebakang.
Edek belaki ka Jelani beranak ka Ensingan ke belaki ngambi Jembu lalu beranak ka Salok, Ansat, Anji, Ampoi, Nyireng, Janta, Bau enggau Medang kedua bali nama Alo (Apai Lemaie).
Salok bebini diambi Jabai beranak ka Dinggu, Jelani, Chandi enggau penulis empu sereta siku anak iru.
Nya alai enti dikira berapa peturun, tusut tu ngagai Singalang Burung aja bisi 27 peturun ngagai tubuh penulis empu. Enti dikira ari Antu bisi kira 36 serak tubuh.
Taja pia engka tak bisi saru tauka enda betusun sebaka enggau enggi pemacha bukai, penulis minta ampun, laban tu bepun ari pansik ke bisi ilap mimit tauka enda sebaka enggau enggi sekeda pemacha.
Taja pia, enti pemacha bisi nemu tusut tau mega magi ngagai penulis ngena email anyakedap@yahoo.com.my
Nya alai dia kitai meda penyauh tusut kitai Iban, nyau ngeluie ari Singalang Burung.
Reti nya penemu ke betampung-tampung ari kelia nya ngayanka pengepuoh kitai Iban dulu menya ngemeranka tusut, enggai ka enda nemu kaban belayan sereta enggau aki ini diri.
Orang kelia enggai disema orang ‘aki ini diri pan enda nemu’. Reti nya, orang nya nadai asal ti meruan, laban enda nemu penatai diri empu. Ukai nya reti sida nya orang jai tauka merinsa, mina nya sema jaku kitai Iban menya.
Ba dunya moden tu, semua tu nyadi ka penemu simpan aja, lalu engka nadai berega tauka relevan agi.
Taja pia, kitai patut temegah ati sama peturun Singalang Burung, ke nyau dikira nyadi petara bumai betaun orang menya.
